A site about nothing...

miðvikudagur, apríl 23, 2003

Vísindavefurinn heldur áfram að koma á óvart og hérna eru nokkrar góðar spurningar sem þeir hafa svarað.
Spurt er:
Hvað verður um endurnar á Tjörninni þegar þær drepast?
Svar:
Spurningin í heild sinni hljóðaði svona:
Hvað verður um endurnar á Tjörninni þegar þær drepast? Vinnur einhver við að hreinsa upp hræin?

Þegar fréttist af dauðum fuglum á Tjörninni taka Meindýravarnir borgarinnar að sér að fjarlægja hræin. Dauðar endur, gæsir og álftir eru afhentar Karli Skírnissyni líffræðingi á Keldum til rannsóknar, meðan aðrir fuglar, til dæmis mávar, eru urðaðir. Einstaka fugl fær hátíðlegri meðferð og er jarðsettur með viðhöfn í Hljómskálagarðinum!

Spurt er:
Af hverju er þotuliðið kallað svo?
Svar:
Orðið þotulið er þýðing á jet set úr ensku. Á 6. áratug 20. aldar fór fólk að nota orðasambandið jet set um hóp ríks fólks sem lifði hátt og flaug gjarnan með þotum milli dvalarstaða sinna hér og þar um heiminn.

Á þessum tíma voru þotuferðir ekki eins tíðar og útbreiddar og nú og ákveðinn ljómi var yfir slíkum ferðamáta sem hefur sjálfsagt dofnað eftir því sem fleiri gátu leyft sér þennan munað. Núna er orðið þotulið kannski helst notað um ákveðinn hóp fólks sem er mikið í sviðsljósinu en það hvort viðkomandi fólk ferðast mikið með þotum skiptir minna máli nú en það gerði fyrir hálfri öld.

Svo að lokum ein hérna mjög áhugaverð.
spurt er:
Hvaða hljómplata er mest selda plata allra tíma og hvað seldist hún í mörgum eintökum?
svar:
Mest selda hljómplata allra tíma mun vera breiðskífa hljómsveitarinnar Eagles og nefnist hún 'Their Greatest Hits 1971-1975'. Hún hefur selst í yfir 27 milljón eintökum, sem þýðir 27-falda platínusölu á bandarískan mælikvarða.

Næstu plötur í röðinni eru 'Thriller' með Michael Jackson, plata Pink Floyd 'The Wall', 'Untitled (IV)' með Led Zeppelin og vinsælustu lög Billy Joel, eða 'Greatest Hits Volume I & II'.

Mest selda smáskífa allra tíma er með laginu 'Candle In The Wind 1997' sem Elton John gaf út til að heiðra minningu Díönu prinsessu. Sú smáskífa seldist í 11 milljón eintökum.