Ég var í skólanum í dag sem er svosem ekki frásögufærandi nema fyrir þær sakir að í hádegismat fékk ég mér fiskibollur í dós í karrýsósu og mjólk með, en þetta var einmitt kvöldmatur gærdagsins. Ég sat með Tryggva og Önnu Regínu og þau hófu upp þvílík læti, fussuðu og sveiuðu og áttu varla orð til að ég væri að borða fiskibollur í dós. Mér fannst hreint út sagt, að mér vegið þarna, þar sem ég sat og borðaði mat sem mér þykir hvað bestur að borða, eitthvað síðan úr æsku held ég. Tryggvi sagði að lyktin af sænsku munntóbaki væri betri en þetta og fékk sér í vörina, en því er ég algjörlega ósammála. Finnst engum þetta gott nema mér kanski?
Fékk í dag loksins fartölvuna mína sem var gjöf frá fjölskyldu minni til mín. Þetta er þvílíkt yndi þessi tölva að orð geta varla lýst því að mínu mati. Ég er of latur núna til að skella inn mynd, en ég finn eina við tækifæri og skelli henni hér, ykkur til yndisauka. Svo er ekki verra að við erum að fara að fá Hive netið hingað heim sem þýðir að ég verð í þráðlausu sambandi og góðu chilli bara :D.
Fór í bíó og út að borða í kvöld með bróður mínum, og frænda og frænku minni. Byrjuðum að snæða á Friday´s sem er án vafa uppáhaldsveitingastaðurinn minn á Íslandi held ég. Fékk mjög góða kjúklingasamloku og svo í eftirrétt, bombuna chocolate brownie sunday, sem er syndsamlega góð. Svo fórum við að sjá Finding Neverland og ég verð að segja að ég var mjög sáttur við hana. Myndin hafði svona ævintýralegan blæ yfir sér soldið, enda sýnir hún hvernig ævintýrið um Pétur Pan varð til, en svo eru líka svona hjartnæm augnablik, en alls ekki væmin. Maður fékk svona nettan klökk á ákveðnum köflum verð ég hreinlega að viðurkenna, maður er orðinn svo meyr í seinni tíð.